T-GREEN նախագծի առաջիկա կարևոր փուլային միջոցառումը՝ «Մագիստրոսական ծրագրերի պիլոտային իրականացման արդյունքների քննարկման աշխատաժողովը», կկայանա Պորտուի Կաթոլիկ համալսարանում (Catholic University of Portugal) 2025 թվականի դեկտեմբերի 2–4-ը։
Եռօրյա այս միջոցառումը կհամախմբի Հայաստանի և ԵՄ գործընկեր համալսարանների ներկայացուցիչներին, ինչպես նաև կոնսորցիումի այլ անդամներին՝ քննարկելու Erasmus+ T-GREEN («Transforming Graduate Education for a Green and Sustainable Future») ծրագրի շրջանակում մշակված մագիստրոսական նոր ծրագրերի պիլոտային իրականացման արդյունքները։ Այն նաև հնարավորություն կտա համատեղ ձևավորելու դրանց հետագա կատարելագործման և երկարաժամկետ կայունության ապահովման ուղիները։
Աշխատաժողովը պաշտոնապես կբացվի Universidade Católica Portuguesa-ի ներկայացուցիչների և հայկական կողմի նախագծի ղեկավարության ողջույնի խոսքերով։ Բացման ելույթներում կընդգծվի մագիստրոսական կրթության արդիականացման ռազմավարական նշանակությունը՝ կանաչ և կայուն ապագայի ապահովման տեսանկյունից, ինչպես նաև վերահաստատվի կոնսորցիումի ընդհանուր հանձնառությունը համատեղ և բազմակի դիպլոմների զարգացման ուղղությամբ։